एक युगको अन्त्यः सबैभन्दा ठूलो टोरेन्ट सर्च इन्जिन टोरेन्ज बन्द

पाइरेसी साइट तथा सर्च इन्जिन किकस टोरेन्ट्स बन्द भएको केही हप्ता नबित्दै अर्को सबैभन्दा ठूलो टोरेन्ट सर्च इन्जिन टोरेन्ज डट इयु पनि बन्द भएको छ ।
मिडिया रिपोर्ट अनुसार टोरेन्ज डट इयुले शुक्रबारबाट आफ्नो पोर्टलहरु बन्द गरेको छ ।
हालैमात्र पाइरेट बे ले आफ्नो साइट बन्द गर्ने निर्णय गरेको थियो । त्यसैलाई पछ्याउँदै टोरेन्जले पनि आफ्ना दशौँ लाख प्रयोगकर्तालाई विदाई गरेको छ ।
सन् २००३ मा स्थापना भएको टोरेन्जका दैनिक दशौँलाख भिजिटर्स पुगेका थिए र यो सबैभन्दा धेरै प्रयोग गरिने टोरेन्ट साइटमध्ये एक थियो ।
टोरेन्जको होमपेज अझै एक्टिभ भएपनि यसले सर्च कार्यभने पूर्णरुपमा निस्त्रिmय बनाएको छ र सबै टोरेन्ट लिंकहरु पनि हटाएको छ ।
टोरेन्जमा अहिले केही चिजहरु सर्च गर्दा यस्तो टेक्स्ट आउँदछः टोरेन्ज निशुल्क, तिव्र तथा शक्तिशाली मेटासर्च इन्जिन थियो जसले दर्जनौँ सर्च इन्जिनबाट लिएका नतिजाहरु एकत्रित पारेर देखाउँथ्यो ।
टोरेन्जमा अब लगइन गर्न सकिनेछैन । लगइन गर्दा मेसेज आउँछः टोरेन्जले तपाइँलाई सधै माया गर्नेछ, विदाई ।
स्मरण रहोस् पाइरेसी साइट किकस टोरेन्टका संस्थापक ३० वर्षीय आर्टेम भलिन २ हप्तअघि पोल्याण्डमा पक्राउ परेका थिए । उनलाई प्रतिलिपि अधिकार, मुद्रा निर्मलीकरण लगायतका विभिन्न ४ मुद्धामा अमेरिकी अदालतमा करोडौँ क्षतिपूर्ति तथा सजाय माग गरी मुद्धा चलाइँदैछ । संस्थापक भलिन पक्राउ परेसँगै किकस टोरेन्ट बन्द गरिएको छ ।