गल्कोटमा नेपाल कम्युनिष्ट पार्टीको सभामा प्रवेशीलाई स्वागत

काँडेवास गाविसका पूर्व उपाध्यक्ष भीमबहादुर शेरचन सहित ४ सय २९ जना प्रवेश

बागलुङ, २९ असार – नेपाल कम्युनिष्ट पार्टीको एकता सन्देश जनताका बीचमा पु¥याउने लक्ष्यका साथ गल्कोट बजारमा शुक्रवार एकता सन्देशसभा सम्पन्न भएको छ । पार्टी जिल्ला कार्यदल बागलुङले आयोजना गरेको एकता सन्देश सभामा बोल्दै पार्टीका स्थायी कमिटि सदस्य तथा बागलुङ क्षेत्र नं. २ बाट निर्वाचित प्रतिनिधिसभाका सदस्य देवेन्द्र पौडेलले देशमा व्याप्त गरिवी, अभाव र अशिक्षाको अन्त्यका लागि शक्तिशाली पार्टीको आवश्यकता महसुस गरेर पार्टी एकीकरण गरिएको बताए । नेपाली कांग्रेसको भविष्य छैन, पटक पटक बहुमत पाएर पनि उसले स्थिरता दिन नसकेको आरोप लगाउदै पौडेलले काग्रेसका कार्यकर्ताहरुलाई पनि नेपाल कम्युनिष्ट पार्टीमा समाहित हुन आव्हान गरे ।
कार्यक्रममा केन्द्रीय सदस्य तथा प्रतिनिधिसभाका सदस्य मनकुमारी केसी, केन्द्रीय सदस्य गोविन्द नेपाली प्रदेशसभाका सदस्य इन्द्रलाल सापकोटा र चन्द्रबहादुर बुढा, प्रतिनिधिसभाका सदस्य डा.सूर्य पाठक, नेपाल कम्युनिष्ट पार्टीमा प्रवेश गरेकाहरु मध्येबाट पूर्व जनप्रतिनिधि भीमबहादुर शेरचन र महिला नेतृ कौशिला घर्ती मगर लगायतले मन्तव्य व्यक्त गरेका थिए । कार्यक्रम नेपाल कम्युनिष्ट पार्टी जिल्ला कार्यदलका सदस्य फमलाल निउरेको अध्यक्षता, सदस्य ज्ञामनाथ गैरेको स्वागत र सदस्य लालबहादुर थापाको सञ्चालनमा सम्पन्न भएको थियो ।
सोही कार्यक्रममा राष्ट्रिय जनमोर्चा र नेपाली कांग्रेस परित्याग गरी ४ सय २९ जना नेपाल कम्युनिष्ट पार्टीमा प्रवेश गरेको जानकारी दिईएको थियो । साविक काडेवास गाविसका पूर्व उपाध्यक्ष तथा राजमो गलकोट नगरपालिका वडा नं. ८ का अध्यक्ष भीमबहादुर शेरचन, राजमो जिल्ला सदस्य तथा गलकोट नगर उपाध्यक्ष कौशिला घर्ति मगर, राजमो जिल्ला सदस्य तथा राजमो समर्थित शिक्षक संगठनका जिल्ला सदस्य नमकुमारी सापकोटा, पूर्व जनप्रतिनिधि गुञ्जबहादुर केसी, शशिधर भट्टराई लगायत ४ सय २९ जना प्रवेशीहरुलाई स्वागत गरिएको थियो ।