नेकपा बैठक निष्कर्षविहीन, असन्तुष्टि २४ गतेको एजेन्डा

असोज ५ गतेको निर्णयमा वरिष्ठ नेता नेपाल र सदस्य नारायणकाजी श्रेष्ठले आफ्ना असन्तुष्टि बैठकमा राखेका थिए।

काठमाडौं, २२ असोज – पार्टीभित्रको असन्तुष्टि लगायतका विषयमा समीक्षा गर्न सत्तारुढ नेपाल कम्युनिस्ट पार्टीकाे बैठक असोज २४ गते बस्ने भएको छ। सोमबार बसेको सचिवालय बैठकले वरिष्ठ नेता माधवकुमार नेपालले पार्टीमा राखेको फरकमतका विषयलाई २४ गतेको बैठकको एजेन्डा बनाउने तय गरेको हो। आइतबारको सचिवालय बैठकमा प्रधानमन्त्री एवं पार्टी अध्यक्ष केपी शर्मा ओलीले आफ्नो हालै सम्पन्न भ्रमणबारे जानकारी गराएका थिए।
नेपालको राजनीतिक परिवर्तन र शान्ति प्रक्रियाबारे विश्व समुदायलाई अवगत गराउन संयुक्त राष्ट्रसङ्घको ७३ औँ महासभामा आफ्नो सम्बोधन र कोस्टारिकाको भ्रमण सफल भएको जानकारी उनले दिएका छन्। प्रधानमन्त्री निवास बालुवाटारमा सम्पन्न बैठकमा भ्रमणका अवसरमा विभिन्न मुलुकसँगको द्वैपक्षीय सम्बन्ध विस्तारसमेत भएको जानकारी दिएको पार्टी प्रवक्ता नारायणकाजी श्रेष्ठले बताए।
बैठकमा अर्का अध्यक्ष पुष्पकमल दाहाल प्रचण्डको चीन भ्रमण, वरिष्ठ नेता माधवकुमार नेपालको चीन तथा घानाको भ्रमण र प्रवक्ता श्रेष्ठको नेतृत्वमा भएको चीन भ्रमणबारे अवगत गराइएको थियो। असोज ५ गतेको निर्णयलाई लिएर असन्तुष्टि जनाउँदै आएका वरिष्ठ नेता नेपाल र अर्का सदस्य नारायणकाजी श्रेष्ठले आफ्ना असन्तुष्टि बैठकमा राखेका थिए।
प्रधानमन्त्री ओली विदेश जानुअघि पार्टीको सचिवालयले पार्टी एकतापछिको प्रदेश कमिटीका इञ्चार्ज, सहइञ्चार्ज, अध्यक्ष र सचिवको चयनका विषयमा वरिष्ठ नेता नेपालले सार्वजनिक असन्तुष्टि व्यक्त गरेकोलगायत आन्तरिक समीक्षाका लागि भने यही असोज २४ गते बिहान बस्ने सचिवालयको अर्काे बैठकमा छलफल हुने बताइएको छ।
सो बैठकमा प्रदेश कमिटीको पूर्णता, जिल्ला कमिटीको गठन, स्थायी समिति बैठकको मिति तथा कार्यसूची र पार्टी, संसद् तथा सरकारको समीक्षा, केन्द्रीय कार्यालयको व्यवस्थापनलगायत विषयमा छलफल गरिने प्रवक्ता श्रेष्ठले जानकारी दिए।