ठिनी–तिलिचो पदमार्ग निर्माण

मुस्ताङ, २६ कार्तिक — मुस्ताङको घरपझोङ गाउँपालिका–५ मा पर्ने ऐतिहासिक तथा पर्यटकीय गाउँ ठिनीदेखि संसारकै अग्लो स्थानमा रहेको तिलिचो ताल जोड्ने पदमार्ग निर्माण भएको छ । ठिनीदेखि नमखुलेक हुँदै नीलगिरि हिमालको फेदीमा ५१ सय २० मिटरको उचाइमा रहेको मेसोकोन्दो पार गरेर तिलिचो ताल पुग्ने करिब १५ किलोमिटर लामो पदमार्ग जोमसोमस्थित अन्नपूर्ण संरक्षण क्षेत्र आयोजना (एक्याप) को सहयोगमा संरक्षण व्यवस्थापन समिति जोमसोमले निर्माण गरेको हो । आर्थिक वर्ष ०७४्७५ मा विनियोजित दश लाखबाट साढे नौ किलोमिटर र यस वर्ष विनियोजन भएको पाँच लाखबाट पाँच किलोमिटर पदमार्ग निर्माणका साथै विभिन्न ठाउँमा सङ्केत चिह्न राखिएको एक्यापका सब इञ्जिनीयर निकेश शेरचनले जानकारी दिए । जोमसोम–ठिनी हुँदै तीन दिनमा तिलिचो पुगेर फर्किन सकिने यो पदमार्ग समुद्री सतहदेखि चार हजार नौ सय १९ मिटर उचाइमा छ ।

संसारकै अग्लो स्थानमा रहेको मानिएको यो ताल पुग्ने छोटो पदमार्ग भएको एक्यापका प्रमुख तुलसी दाहालले बताए । प्राकृतिक सौन्दर्ययुक्त तिलिचो ताल, नीलगिरि हिमाल, नमखु लेक, हिमचितुवाको बासस्थान, धुम्बा ताल, ह्यारझु भ्यु प्वइन्ट, ठिनीगाउँ, ऐतिहासिक घरफझोङ किल्ला, कैश्याङ क्याम्प, थकाली कला र संस्कृति, भेडा च्याङ्ग्रा तथा चौरीको गोठ यो पदमार्गका आकर्षण हुन् । दुई वर्षअघि सञ्चालनमा ल्याइएको उक्त पदमार्गमा पर्यटक आगमन बढाउन सडक सञ्जालले पनि जोड्ने तयारी भएको छ । ठिनी गाउँदेखि दुई किलोमिटर ताङडुङसम्म पुगेको सडकलाई विस्तार गरेर नमखुलेकसम्म पु¥याउन गण्डकी प्रदेश सरकारले चालू आर्थिक वर्षमा ५० लाख विनियोजन गरेको सांसद चन्द्रमोहन गौचनले बताए। पदयात्रामा जाने पर्यटकको सुविधाका लागि ठिनी गाउँका आठ घरमा थकाली होमस्टे सञ्चालन गरिएको छ । धर्मशाला र गोठ रहेको नमखुलेकमा भने होटल तथा लज नभएकाले क्याम्पिङ गर्नुपर्छ। होमस्टे र पदयात्राको प्याकेज बनाएर पर्यटकलाई भ्रमणको व्यवस्था मिलाउने तयारी भएको छ ।