शिक्षक (कविता)

प्रेम बहादुर थापा

शिक्षक हो यदि तिमी शिक्षक बन्न सिक
पठन पाठन जिवन्त हुन भित्री ज्ञान झिक ।
नझुकोस है माथ तिम्रो बनुन चेला असल
जस्तो वीउ रोप्छौ तिमी त्यस्तै फल्छ फसल ।।

छैन सहज शिक्षक वन्न धेरै कष्ट आउँछ
शालिन धैर्य व्यक्ति मात्र शिक्षक वन्न पाउँछ ।
उनै हुन असल शिक्षक दिन्छ अथाह ज्ञान
नुनको सोझो गर्नु पर्छ सत्य कुरा ज्ञान ।।

गतिलो शिक्षक होइन जो राजनीति झोला बोक्छ
उपस्थित नभईकन हाजिर मात्र ठोक्छ ।
काम प¥यो भने घरमा काज मात्र लिने
असल गुरु बन्दैन उ शिष्यलाई धोखा दिने ।।

शिक्षक आयोग पास गरी खायौ शिक्षक जागिर
गाभिदै छन् विद्यालय यहाँ दोष कस्को आखिर ।
शिक्षक वन्न मन नलागे छाडिदेउ शिक्षण पेशा
जुन काममा मन रम्छ त्यहि गर्दा वेश ।।

वदल्नु छ देशको मुहार शिक्षा पहिलो क्रान्ति
आर्थिक विकास गरी यहाँ त्याउनु छ शान्ति ।
विद्या नै हो उत्तम सुत्र सवले मनन गरौं
सुन्दर, शान्त नेपाल हाम्रो सम्वृद्धि सारा भरौं ।।
–काठेखोला गाउँपालिका–७ बागलुङ
(हाल सिद्धार्थ शिक्षा सदन)

सोमवार, माघ २९, २०७४ मा प्रकाशित

सम्बन्धित सामाग्री