स्वास्थ्य बिमामा १३ हजार जोडिए

बागलुङ, १३ असार – नागरिकको स्वास्थ्य सेवामा राज्यको लगानी बढाउन थालिएको स्वास्थ्य बीमा कार्यक्रममा १३ हजार २ सय जना बिमित भएका छन् ।
सानो अंकको प्रिमियमबाट ठूलो अंकको बीमा गर्न पाईने र निशुल्क औषधिको समेत व्यवस्था भएपछि आर्कषण बढेको हो । २०७२ सालदेखि शुरु भएको यो अभियान बुझाउन समय लाग्दा अघिल्ला बर्ष बीमा गर्नेहरु कम थिए । चालु बर्षको चैत मसान्त सम्म आइपुग्दा बागलुङका ४३ हजार ३ सय जनाले स्वास्थ्य बीमा गरेका छन् ।
अघिल्लो बर्षसम्म २ हजार ५ सय रुपैयाँ तिरेर ५ जनाको परिवारको बीमा गर्न सक्ने व्यवस्था थियो । उक्त बीमाबाट ५० हजार रुपैयाँको उपचारका लाग परिवारका ५ जना सदस्यले सेवा लिन सक्थे । चालु बर्षदेखि भने सरकारले प्रिमियम अंक र सेवा सुविधा समेत थप गरेको छ ।

यो बर्षदेखि ३ हजार ५ सय रुपैयाँको प्रिमियमबाट १ लाख रुपैयाँ सम्मको औषधि तथा उपचार सेवा पाउने व्यवस्था भएको धौलागिरी अञ्चल अस्पतालको स्वास्थ्य बीमा कार्यक्रमका दर्ता अधिकारी नारायणप्रसाद पौडेलले बताए । आर्थिक रुपमा बिपन्न र सिमान्तकृत नागरिकलाई सहजै स्वास्थ्य सेवा दिनका लागि बीमा अभियान ल्याइएको थियो । बिपन्न समुदायलाई शत प्रतिशत, सिमान्तकृतलाई ७५ प्रतिशत र सामान्य गरिब नागरिकलाई ५० प्रतिशत छुट दिने व्यवस्था समेत गरेको छ । बीमाका लागि कार्यक्रमले दर्ता सहयोगी घरघरमा पठाउने व्यवस्था समेत गरेको छ । स्वास्थ्य बीमा गरेका व्यक्तिले कृतिम गर्भाधान, दाँत उपचार र कस्मेटिक सर्जरी लगायतका उपचार सेवामा भने बीमा कार्यक्रम आर्कषित नहुने उनले बताए । बीमामा दर्ता भएको ४ महिना देखि बिमितले स्वास्थ्य सेवा पाउने प्रावधान छ ।

स्वास्थ्य कार्यालयमार्फत सरकारले अनुदान दिएर बिमितको संख्या बढाउने योजना राखेको छ । जिल्लाका ४ हजार घरका २० हजार नागरिकलाई निशुल्क बीमा गराउने योजना ल्याएको सरकारले अहिलेसम्म काम भने थालेको छैन । शुरुमा बीमा गरेका बिमितले औषधि नपाएपछि रिन्यु नगरेको गुनासो बढेको छ । ‘मुटुरोग सहितका दिर्घ रोगीले भने रिन्यु गरेका छन्, अरुको चासो कम छ’ जिल्ला स्वास्थ्यका क्षयकुष्ठ अधिकृत देवप्रकाश घिमिरेले भने, ‘औषधि नपाएकोले धेरैको गुनासो आउने गरेको हो ।’
प्रशिक्षार्थी